فضائية الطريق

انت فى الرئيسية اخر الاخبار مقالة من اسعاد يونس عن الاقباط
الجمعة, 03 مايو 2013 10:18

مقالة من اسعاد يونس عن الاقباط

كتبه 
قييم هذا الموضوع
(1 تصويت)
مقالة من اسعاد يونس عن الاقباط
2013-05-03 01:40:33
مقالة من اسعاد يونس عن الاقباط

■ السادة المحترمون الهيئة العامة للرقابة المالية.. تانى وتالت ورابع.. واللى زهقان يفوت الحتة دى فهى تخص مساهمين بالآلاف.. لم نسمع منكم أى تصريحات.. عل المانع خير.. هل تعلمون أن هناك منشورا تم تعميمه على المساهمين من قبل مراكز حفظ الأسهم جى دى أر بأنه سيتم خصم خمسة سنتات من سعر السهم البالغ ثلاثة دولارات ونصف برشطة كده؟؟.. قالك مادام المصريون سيقتطعون عشرة فى المائة من قيمة السهم لحساب الضرائب احتياطى يعنى فى حالة تفعيل القانون فإحنا كمان نقص الخمسة سنت.. مما يعنى أن المساهم الذى سيبيع سهمه بثلاثة دولارات ونصف قصرا وإذعانا لأنكم لم تحافظوا عليه ولم تراعوا مصلحته سيصله منهم ثلاثة دولارات وعشرة سنت.. وهل تعلمون أن مساهمى سوسيتيه جنرال لم يستردوا حتى الآن المبلغ المقتطع لحساب الضرائب برضه رغم أن البيعة تمت قبل التفكير فى أى قانون؟؟.. حساب الناس المهدرة أموالهم دول عند مين؟؟.. ومادام بتقتطعوا عشرة فى المائة لحساب الضرائب فما هو الضرر من وقف البت فى العرض حتى تصلوا مع المساهمين للسعر الحقيقى للسهم؟؟.. ليه تهدروا مال المساهمين ومال الدولة اللى داخلها ضرائب؟؟.. ده السهم لو اتباع بستة دولارات سيدخل للدولة ستون سنتا بدل الخمسة وتلاتين.. يعنى تقريبا الضعف.. أمر غير مفهوم يجعل الواحد مخه يجيب ويودى.. ويفكر لمصلحة من يحدث هذا؟؟.. ولكنه لن يمنعه من المطالبة بحقه بجميع الطرق القانونية مهما طال الزمان وفى عهد أى نظام وتحت أى حكم.. إحنا الحاجات دى ولا تفرق معانا.. آه وعهد الله.. ■ ملحوظة: يا سيدى لقد رفضت صفقة إى إف جى هيرميس مبرراً ذلك بخوفك على المساهمين، رغم أنهم كانوا سعداء بهذه الصفقة.. عقبال ما تحرص على مصالح مساهمى أوراسكوم تليكوم المتضررين التعساء اللى حايتخرب بيتهم. ■ يتساءل البعض: هو كل ما حايحل عيد للأقباط حاتخرج علينا الأصوات النشاز الشؤم دى تحرم تهنئتهم بأعيادهم؟؟.. ويقولون عرفنا والله.. علينا النعمة عرفنا.. إركنوا على جنب بقى بلاش خوتة.. مش ناقصة قتلى المشرحة يعنى.. ولكنى أختلف معهم.. وأرحب تماما بنعيق البوم هذا.. بل وأفرح به.. بيفكرونى أقوم جرى أهنى إخواتى وأصحابى قبل ما يفوتنى الواجب.. فشكرا لهؤلاء الذين يذكروننى.. أحبابى وأبناء وطنى وشركائى فى لقمة عيشى وهوا رئتى ورقمى القومى.. اليوم الجمعة الحزينة وبكره سبت النور وبعده عيد القيامة.. كل سنة وأنتم بألف ألف خير وسعادة وصمود.. أما تلك الأوتار المقطوعة التى لا تصدر إلا تزييقا مزعجا.. موتوا بغيظكم.. ■ وأحب أضيف.. إننا فى شم النسيم حناكل بيض ملون.. وحانفسخ ونبصل وحاننيل الدنيا بستميت نيلة.. فكما أن هناك كارهين للأقباط.. فيه ناس مش طايقة شم النسيم.. وبرضه بتكفر اللى بيلونوا البيض.. فبما إنكم خليتوا العيشة كلها بيض.. فلا مانع من تلوينه عشان نبلع المصيبة اللى إحنا فيها.. ■ أصبحت شغلة كل من ينتمى للتيار الليبرالى واليسارى والمعتدل واللى مالوش تيار خالص ومواطن عادى إنهم يدافعوا عن الإسلام اللى حضراتكم نازلين لغمطة فيه.. مابقالناش شغلانة غير الإمساك بتلابيب العيال الصغيرة اللى بتنط من شباك العقيدة وينضموا لتجمعات الإلحاد فى السر هربا من ذلك الدين العجيب الذى تروجون له.. والسؤال: لما توصلوا لدولة الخلافة اللى بتحلموا بيها على جثثنا دى.. حاتطفحوا منين؟؟؟؟؟.. اللى ماعندكوا مهارة واحدة تغنيكم عن سؤال البشرية.. اللئيم منها والمتقدم المستنير الصانع للحضارة.. حاتقضوها شحاتة؟؟.. وده مين ده اللى حايفضل يشحّتكوا وبأمارة إيه؟؟.. فى الآخر حايكعبشوا المنطقة كلها زى علبة السجاير الفاضية ويطوحوكوا فى أقرب صفيحة زبالة ويخلصوا من صداعكوا وزنكوا وإرهابكوا.. العالم بجد مش ناقصكوا.. ■ المهندس الجليل حسب الله بك الكفراوى.. قالك فى حديثه مع ريم ماجد إن الفرد اليابانى لو قبل العزومة على الغدا بصفتها رشوة بيروّح بيتهم ويديها هاراكيرى.. أى ينتحر بالطريقة اليابانية التقليدية.. يجيب سيف طويل حلو كده.. ويقعد على ركبه وييجى غازز نفسه بيه.. ويمكن فى لحظتها بيقول «سامحينى يا يابان.. أنا خنت تقاليدك وشرفك ولوثت سمعتك وساهمت فى إنك تتراجعى ولو فيمتو ميللى عن مشروع النهضة بتاعك»!!!.. ولذلك أقترح أن نقوم بحملة قومية لجمع السيوف من أشباه البنى آدمين اللى بينزلولنا الشوارع شاهرينها فى وجهنا وهما متشبهين بالبعو اللى بيبرّق ويريل ده.. وذلك كخطوة أولى لحد ما نعمل اكتتاب ونشترى السيوف الباقية من الصين ونغز نفسنا كلنا.. ده هما بينتحروا عشان خانوا مشروع نهضتهم اللى هتّوا بيه العالم كله من أيام الحرب العالمية التانية.. شوف إنت نهضتنا إحنا عاملة إزاى؟؟.. يا ليلة سودة.. ■ إلى هؤلاء الذين يهاجمون فضيلة الإمام الأكبر الشيخ الطيب.. إنتوا بتهببوا إيه بالظبط؟؟.. منظركوا إيه قدام العالم اللى شايف الرجل النبيل يكرّم من دولة كريمة ويُحترم ويتشال على الرأس.. ويُمنح هدية يتبرع بكاملها للأزهر الشريف.. ويتم إكراما له ولنبله الإفراج عن السجناء المتعثرين ماديا من أبناء وطنه لجل خاطر عيونه ومقامه.. جتش من البهوات اللى حاكميننا وفاضحيننا فى نفس الوقت.. ما تبطلوا هرتلة بقى.. هو مفيش مخ خالص؟؟.. بتعادوا الأزهر والكنيسة والجيش والشعب.. ده إيه أم الخيابة دى؟؟.. وبعدين تزعلوا لما نقولكم اتزاحوا بقى خنقتونا.. ■ السيد الفريق السيسى.. لى طلب صغير عندك.. أرجوك استرجع الشريط الذى ألقيت فيه كلمتك فى الاحتفال بتحرير سيناء فى جامعة المستقبل والذى تلى الأوبريت الرائع «حبيبى يا وطن» الذى أخرجه المبدع دائما الدكتور خالد جلال، وأبدع كلماته الخال عبدالرحمن الأبنودى، والشاعر نادر عبدالله، وألحان وليد سعد.. وبطولة تلك المجموعة الجميلة من النجوم.. أكيد لديك تصوير لهذا الحفل من عدة زوايا.. تأمل جيدا وجوه هؤلاء الذين كانوا ينظرون إليك ويستقبلون كلمتك.. تأملها جيدا.. بدءا ممن كانوا على المسرح، ومرورا بالجالسين فى القاعة.. واعلم أن نفس التعبيرات والدموع واللهفة كانت متمثلة فى عيون ملايين آخرين يتابعون الحفل.. اعلم أيضا أن المشاعر التى طغت على الناس كان قد طال الشوق إليها.. فقد افتقدها الناس على مدى الشهور الماضية.. وكان الخوف أن تموت من اليأس والكرب.. ولكنها استيقظت فجأة وكأن ذلك الزمن لم يمر وتلك الروح الوطنية لم تخدش.. فمصر أغلى من كل الناس وكل الأشياء وأسمى من كل الهموم وأقوى على كل المؤامرات.. بس خلاص.. كلامى خلص.. ■ يعلن ائتلاف العوالم برئاسة المرحومة زوبة هانم الكلوباتية ومساعدة أمين سر الائتلاف المرحومة نظلة باشا العدل وسكرتارية شفيقة حل عن أمى مش طايقاك شديد الامتعاض وقلب المعدة من تمثيلية تسمم طلاب الأزهر.. ويؤكد الائتلاف أن كار العوالم قد تضرر من محاولة الهواة الفشلة إلصاق أنفسهم به والحط من قدره والتأثير السلبى على سمعته، مما جعل العامة يتطاولون عليه قائلين إيه شغل العوالم ده؟؟.. وفى إطار ترفعه عن ذلك الفصيل يعلن البدء فى الدعوة لمليونية «إجرى العب بعيد يا ولا.. الشغل ده مش عندنا.. نحن أشرف من ذلك بكتيييير».. مؤكدا إن اللى عايز يعرف ده شغل مين.. يجرى يدور فى شارع كلوت بك.. حيث يتم استصدار التراخيص من هناك..

>>

Search Results















إقرأ 2067 مرات

وسائط

رأيك في الموضوع

جميع الحقول المنمرة بعلامة النجمة مطلوبة و يجب استكمالها لنشر تعليقك .. رجاء عدم استخدام الفاظ غير لائقة فى التعليقات و احترام اراء الاخرين .. من حق المحطة حذف اى تعليق لا يتماشى مع سياسة المحطة مع عدم الرجوع الى صاحب التعليق..

شارك اليوم فى عمل الله و امتداد ملكوته